Gipahigayon sa syudad sa Tagum ang pinakaunang E-Bike Motocross Race for Kids diin nagpakita sa kahanas ang mga chikiting nga rider sa matag liko sa race track, nagpaandar sa ilang ebike ibabaw sa mga hump, ug nag-ginukdanay paingon sa finish line sa usa ka talagsaong lumba nga daw sama sa pang-pro ang dagan niadtong Sabado, Enero 24, 2026.
Kini ang nasaksihan sa pinakaunang Tagum City EBike Motocross Race for Kids nga gipahigayon sa San Agustin Botanical Park, diin gisalmutan kini sa mga batang 5 anyos paubos ug 6 anyos pataas.
Suot ang kumpletong racing gears ug sakay sa electric bikes, gigamit sa mga kabataan ang bag-ong race track nga espesipikong gidesenyo alang kanila.
Dungan usab nga gipahigayon sa maong lugar ang Dirt Push Bike Race uban sa push bike community sa giingong siyudad, nga nakadugang sa kasadya sa maong kalihokan.
Sumala ni Kimboy Pineda, usa ka iladong Tagumenyo Motocross Champion ug organizer sa torneyo, ang Tagum maoy unang siyudad sa nasud nga nagpahigayon og EBike Motocross Race for Kids gamit ang race track nga haum gayud sa mga bata.
Nagpasalamat ang lokal nga panggamhanan sa Two-Wheelers, pamilya sa kid rider nga si Kayuz, ug sa RFN Ebikes sa pagtinabangay aron mapahigayon ang maong kalihokan kauban ang LGU-TAGUM.
Sumala pa ni Mayor Rey Uy, dakong tabang ang maong kalihokan aron ma-engganyo ang kabataan sa aktibong estilo sa kinabuhi ug malikayan ang sobra nga paggamit sa mga gadget.
Samtang nagkadaghan ang mga sports adventure activities sa Tagum, nadugang ang ebike sa mga ginapahigayon nga push bike race sa City Hall Grounds. Gilauman usab nga sa dili madugay matukod ang Race Track Unlimited sa Barangay Apokon alang sa mga amateur ug pro-motocross riders.
Photo courtesy: Tagum LGU
