Patay ang usa ka mekaniko human gipusil sa dughan sa Purok Caimito, Barangay Sanito, lungsod sa Ipil, Zamboanga Sibugay kagabii Enero 27, 2026.
Sa maong insidente, nasamdan usab ang usa ka 43-anyos, minyo, tag-iya sa motor shop diin nag trabaho ang namatay ug residente sa Top Mars 2, Barangay Veterans Village, nga nakaangkon og tulo ka samad sa paa.
Sumala sa Ipil Municipal Police Station, nadawat nila ang tawag bahin sa pagpamusil ug dayon miresponde sa lugar aron beripikahon ug imbestigahan ang nahitabo.
Naabtan sa mga pulis nga ang mga biktima nagkadugo human nakaangkon sa samad pinusilan sa lawas.
Sa inisyal nga imbestigasyon, nag-ayo og motor ang duha sa maong shop sa dihang kalit giduol sa mga suspek ug gipusil sa walay daghang storya. Gidala ang duha sa Dr. George T. Hofer Medical Center, apan wala namasalbar pa ang nasampit nga biktima.
Padayon pa ang imbestigasyon sa motibo sa krimen ug gipahigayon ang hot pursuit ug follow-up operations sa Ipil Municipal Police Station aron masikop ang reponsable sa krimen.
