Gipakusgan pa sa Department of Health – Center for Health Development (DOH-CHD) Caraga ang kampanya sa pagbakuna batok measles ug rubella human makarekord og misaka nga mga kaso sa pipila ka syudad ug probinsya sa rehiyon.
Sumala ni Dr. Amethyst Kathleen G. Alicante, Medical Officer IV sa DOH-CHD Caraga, base sa datos sa rehiyon, adunay mga lugar nga nakasinati og dako nga pagsaka sa kaso sa measles ug rubella, maong gikinahanglan nga padayon ug palig-onon ang bakunahan.
Matod pa ni Dr. Alicante, ang Surigao del Sur nakatala og 240 porsyento nga pagtaas sa mga kaso, gisundan sa Cabadbaran City nga adunay 67 porsyento, Agusan del Sur nga adunay 27 porsyento, ug Tandag City nga adunay 25 porsyento nga pagtaas.
Tungod niini, gi-awhag sa DOH-CHD Caraga ang tanang ginikanan nga adunay mga anak nga nag-edad og unom (6) hangtod 59 ka bulan nga ipabakuna ang ilang mga anak aron malikayan ang pagkatakdan sa measles ug rubella ug ang posibleng grabe nga komplikasyon nga dala sa maong mga sakit. Gipasiguro usab ni Dr. Alicante nga luwas ug kasaligan ang bakuna.
Gi-awhag sa DOH-CHD Caraga ang mga ginikanan nga nakasinati na sa kaayohan sa bakuna nga maninguha usab pagdasig sa uban, labi na sa mga nagduhaduha, alang sa kahimsog ug kaluwasan sa tanang kabataan.
Photo courtesy: PIA Caraga Region
