Andam na ang Sugbo sa pagpahigayon sa Sinulog 2026 karong Dominggo, Enero 18, matod ni Konsehal Dave Tumulak, nga nagpamatuod nga kompleto na ang mga preparasyon alang sa dakong kapistahan.
Gimuntar na ang mga bleachers sa ruta sa engrandeng parada nga makalingkoran sa kapin 12,000 ka katawhan.
Gipahugtan usab ang monitoring sa kapolisan aron masiguro nga walay magpahimulos sa maong mga lingkoranan, ilabi na kay libre kini sa publiko, lakip na ang mga tiguwang, bata, ug buntis nga kabahin sa vulnerable sector.
Giawhag usab ang mga establisimento daplin sa parada nga ipagamit ang ilang mga pasilidad sa publiko, bisan pa og adunay gamay nga bayad alang sa pagmintinar sa kalimpyo.
Alang sa mga mabulag sa ilang kauban panahon sa selebrasyon, giandam ang Cebu City Hall isip lost and found area aron dali silang matagbo ug matabangan.
