Nadakpan sa Barobo Municipal Police Station (MPS) ang usa ka high-value individual (HVI) human sa usa ka malampusong buy-bust operation batok sa ilegal nga droga nga gihimo alas 3:30 sa hapon, Enero 15, 2026, sa Purok 4, Barangay Dughan, Barobo, Surigao del Sur.
Ang operasyon gipangulohan ni PCPT Eric V. Dangate, Deputy Chief of Police, ubos sa pagdumala ni PMAJ Ralph Alexis O. Avenida, Acting Chief of Police sa Barobo MPS, isip kabahin sa padayon nga kampanya sa kapulisan kontra ilegal nga droga.
Sa maong operasyon, nasakmit gikan sa suspek ang unom (6) ka sachet sa gituohang shabu nga adunay kinatibuk-ang gibug-aton nga 40.95 gramos ug gibanabanaang kantidad nga ₱278,460.00. Nakuha usab sa iyang pagpanag-iya ang usa (1) ka .38 caliber revolver ug upat (4) ka buok live ammunition.
Gipahibalo dayon ang suspek sa iyang mga katungod ubos sa Miranda Doctrine ug sa Anti-Torture Act. Karon, anaa siya sa kustodiya sa Barobo MPS kauban ang mga nasakmit nga ebidensya alang sa hustong disposisyon ug pagpasaka sa angay nga mga kaso.
Photo courtesy: Barobo MPS
