Dakpan ang usa ka lalaki human kini nasakmitan ug 20 gramos nga marijuana pinaagi sa gipahigayong drug buy-bust operation sa Purok Eco 5, Brgy. Galas, Dipolog City, Zamboanga Del Norte niadtong Enero 14, 2026.
Giila ang dinakpan nga si alyas Jake, 18-anyos, ulitawo, estudyante ug residente sa nasangpit nga dapit.
Nakuha gikan sa dinakpan ang duha ka dakong pakete nga gisudlan sa pinaugang dahon sa marijuana isip buy bust item ug dugang isa ka pekete sa marijuana nga nakuha sa iyang posisyon.
Lakip sa nasakmit ang usa ka itom nga belt bag, 500 peso bill nga gigamit isip buy bust money, ug uban pang mga non-drug items.
Mokabat sa 20 gramos ang nasakmit nga marijuana nga nagkantidad ug Php2,400.00.
Giturnover ngadto sa Zamboanga Del Norte Provincial Forensic Unit ang mga nasakmit nga druga samtang ang dinakpan gikustudiya sa Dipolog City Police Station alang sa tukmang disposisyon.
Photo Courtesy: Dipolog CPS
