Gipadayag ni Vice Mayor Alfonso S. Casurra, atol sa 1st Regular session sa dakbayan sa Surigao nga nailhan na sa kapulisan ang tulo ka indibidwal nga responsable sa miaging mga insidente sa Bandalismo sa dakbayan.
Sumala ni Vice Mayor Casurra, usa sa mga suspek menor de edad, samtang duha ka hamtong nga lalaki ang kauban niini.
Nakita ang mga suspek nga nagsakay og motorsiklo samtang nagbutang og graffiti sa nagkalain-laing pader, roll-up doors, ug mga padir sa tulonghaan sa Surigao City.
Ang mga graffiti sama sa pirma o ngalan sa mga suspek. Nakahatag og dakong tabang sa imbestigasyon ang mga CCTV camera, diin gihimo ang backtracking sa mga video recording nga mitultol sa pag-ila sa mga suspek ug sa motorsiklo nga ilang gigamit, lakip na ang plate number niini.
Sa pagkakaron, nagbuhat na og aksyon ang mga awtoridad, samtang ang mga proseso nga may kalabutan sa menor de edad nga suspek ginahimo subay sa balaod.
