Gipahiluna na sa nagbangutang pamilya ang patay’ng lawas sa biktima nga naanod sa suba sa Dipaya, Labangan, Zamboanga del Sur, niadtong nakalabay nga adlaw.
Matod ni Ermilinda Dumolang, asawa sa biktima nga ilang ihaya sulod lang sa tulo ka adlaw ang patayng lawas sa iyang bana nga si Robert Dumolang, 48-anyos diha ra usab sa ilang panimalay sa Purok 2, Dipaya, Labangan, Zamboanga del Sur.
Kahinumduman, ang biktima naanod sa suba samtang pauli na unta kini gikan sa ilang balay apan gumikan sa kakusog sa bul-og sa tubig baha naanod kini.
Samtang Tulo ka adlaw nga nagpahigayon ug search and retrieval operations ang Municipal Disaster Risk Reduction and Management Office (MDRRMO) ug Bureau of Fire Protection (BFP) Labangan aron makita ang patay’ng lawas sa biktima, og napalgan kini sa suba sa Bokong, Labangan, Zamboanga del Sur.
