Wala na kaikyas pa sa mga otoridad ang usa ka lalaki nga gikonsiderang Street level individual human nadakpan sa gikasang buy-bust operation didto sa Block 4, Relocation Site, Barangay Mainit, Cateel, Davao Oriental pasado alas 6:45 sa gabii, niadtong nakalabay nga adlaw.
Ang operasyon gihimo sa mga personahe sa Cateel Municipal Police Station, uban sa mga sakop sa PDEU DOPPO, PIU DOPPO, 1st DOPMFC ug 1103RD RMFB uban sa koordinasyon sa PDEA Region XI nga nagresulta sa pagkasikop ni alyas “CHOY”, 40-anyos, ulitawo, walay trabaho ug residente sa maong munisipyo.
Nakuha gikan sa suspetsado ang duha ka heat-sealed plastic sachet nga adunay sulod sa gituohang shabu ug usa ka PHP500 nga buy-bust money. Samtang gimarkahan ug giimbentaryo sa lugar sa nahitaboan ang mga nasakmit nga ebidensya uban sa mga testigo ug sa suspek mismo subay sa balaod.
Sa pagkakaron ang dinakpan anaa na sa kustodiya sa Cateel Municipal Police Station alang sa hustong disposisyon ug mag atubang sa kasong paglapas sa Section 5 ug 11 sa Republic Act 9165 (Comprehensive Dangerous Drugs Act of 2002).
Photo Courtesy: Pcr Cateel
