Arestado sa kapulisan ang usa ka kanhing miyembro sa Communist Terrorist Group (CTG) human giserbi ang warrant of arrest batok kaniya niadtong nakalabay nga adlaw sa BJMP Regional Office-XI, Tagum City Jail, Purok 3, Barangay Canocotan, Tagum City, probinsiya sa Davao del Norte.
Sumala sa Kapalong Municipal Police Station (MPS), ang operasyon gikasa pinaagi sa usa ka joint effort sa Kapalong PNP, ug ang nagkalain-laing operatiba sa kapulisan sa Davao Norte Police Provincial Office (DNPPO).
Giila ang dinakpan nga si Porderio Tuna, kansang tinuod nga ngalan si Porferio Dianco Tuna, 61- anyos, minyo, walay trabaho, ug residente sa Purok 5, Barangay Maniki, Kapalong, sa samang probinsya.
Siya giila nga kanhing miyembro sa CPP-NPA ug nagsilbi usab kaniadto isip 2nd Deputy Secretary ug plenary member sa EXECOM ilalom sa Pulang Bagani Command 1, Southern Mindanao Regional Command.
Gi-isyu ang maong warrant of arrest ni Honorable Kimal Salacop, Executive Judge sa Regional Trial Court, 10th Judicial Region, Branch 6, Prosperidad, Agusan del Sur, nga pinitsahan niadtong Enero 26, 2017, alang sa kasong Multiple Attempted Murder, nga may girekomendang pyansa nga ₱120,000.
Sa pagkakaron, ang dinakpan anaa na nagpabilin sa kustodiya sa BJMP RO XI, Tagum City Jail alang sa saktong disposisyon ug dugang nga legal nga proseso.
Photo Courtesy:The Progressive
