Gibutyag sa Iligan City Traffic Parking and Management Office (ICTPMO) ang ilang pagka-andam alang ning tuig 2026, nga naglatid og mas hugot nga disiplina sa trapiko sa syudad.
Matod ni Ralph Oblenda, Head sa ICTPMO ug ICOD, nga kalakip sa ilang gipangandaman ang pagpatuman sa Iligan City Oplan Disiplina, nga adunay susamang gimbuhaton sa ilang buhatan.
Gilauman ni Oblenda nga ning tuiga 2026 madugangan ang ihap sa mga traffic enforcer aron mamahimo nang duha ka shift ang ilang trabaho ug mapadayon ang operasyon sa pag-clamp, pagpang ticket, ug pag-roving sa kadalanan adlaw ug gabie.
Nagpasalamat usab si Oblenda sa suporta sa amahan sa syudad pinaagi ni Iligan City Mayor Frederick Siao ilabi na sa paghatag og bag-ong ekipo og uniporme sa mga enforcer, ug labaw sa tanan, ang access sa CCTV aron mas episyente nga mamonitor sa ICTPMO ang kahimtang sa trapiko sa kadalanan.
Gipaklaro usab ni Oblenda nga padayon gihapon ang plano sa pagpalit og speed gun, apan una nga tutukan ang pagdugang og enforcer ug patrol car aron mas paspas ma-intercept ang mga violator sa trapiko.
