Nasikop ang 53-anyos nga babae atol sa gilusad nga drug buy-bust operation sa kapulisan, sa Purok Diamond, P. Reyes Extension, Brgy. Taft, Surigao City, niadtong nakalabay nga adlaw.
Sa impormasyon nga gipadangat ni PLTCOL Atty. Mariano Lukban, Hepe sa Surigao City Police Station, gipahigayon ang anti-drug operation sa–Drug Enforcement Unit (CPS-DEU) uban ang 1st Surigao del Norte Provincial Mobile Force Company (PMFC) ug sa Surigao del Norte–PDEA RO 13.
Naila ang suspek nga si Mariechel Palad Mindaña, 53-anyos, walay trabaho ug residente sa maong lugar. Sumala sa kapulisan, nadakpan ang suspek sa akto nga nagbaligya og ilegal nga droga ngadto sa nagpailang asset nga poseur buyer.
Narekober gikan sa iyang posisyon ang (1) ka plastic sachet nga napalit sa poseur buyer ug unom (6) ka plastic sachets sa gituohang shabu, nga adunay gibug-aton nga kapin kulang 2 gramos. Ang standard drug price value gibanabanang mokabat sa ₱13,600.00 (₱6,800.00 matag gramo).
Lakip sa narekober ang usa (1) ka ₱1,000 bill nga marked money ug usa (1) ka android smartphone.
Ang suspek ug ang nakumpiskang ebidensya anaa na sa kustodiya sa Surigao City Police Station alang sa hustong disposisyon ug gitakdang pasakaan og kaso nga paglapas sa Seksyon 5 ug 11, Artikulo II sa R.A. 9165 o ang Comprehensive Dangerous Drugs Act of 2002.
