Patay ang usa ka 21-anyos nga lalaki human gidunggab sa igsoong manghud niini, sa Barangay Datagan, Pagadian City, atol sa pagsaulog sa Bag-ong Tuig.
Segon sa igsoong babaye sa biktima, lango sa ilimnong makahubog ang biktima nga natulog ilawom sa punuan sa kahoy sa dihang kalit kini nga giduol sa suspetsado nga igsoon dala ang sundang ug gidunggab ang biktima.
Dali nga niabot ang miresponde nga police officers sa lugar, apan sa ilang paghidangat walay nay kinabuhi ang biktima gumikan sa naangkong samad dinunggaban sa wala matino nga parte sa lawas.
Giproseso na sa Zamboanga del Sur Provincial Forensic Unit ang crime scene samtang gipailawom na usab sa post-mortem examination ang lawas sa biktima aron pagkumpirma sa kamatayon niini.
Nagpadayon pa usab sa paglusad ug lawom nga imbestigasyon ang kapulisan aron masuta ang motibo sa suspetsado sa pagbuhat sa kremin.
Sa karon, gihulat na lang usab sa kapulisan ang desisyon sa pamilya ngadto sa suspetsado alang sa pormal nga pagpasaka ug kaso niini.
Photo Courtesy:ANI News
