Gibalibaran ni Danao City Mayor Nito Durano ang pag-isyu og permit sa pipila ka proyekto nga gisugyot sa DPWH alang sa 2026, tungod kay kadaghanan naglambigit sa re-concreting sa mga karsada nga nagpabiling maayo og magamit nga kondisyon base sa assessment sa City Engineering Office.
Matod ni Bise Mayor Ivy Durano nga kini nga mga proyekto wala sa mga prayoridad sa dakbayan nga gipresentar sa DPWH atol sa courtesy call nga nangayo og permit to proceed.
Tungod niini, direkta nga misuwat si Mayor Durano sa Office of the President aron ilhon ang mga prayoridad nga proyekto sa dakbayan sa Danao, lakip ang rehabilitasyon sa mga tulay ug mga istruktura sa flood control nga naguba sa Bagyong Tino, ug paghangyo nga kanselahon og ibalik ang pondo gikan sa mga dili kinahanglanon nga proyekto.
Gipasiugda sa dakbayan sa Danao ang mga proyekto sa imprastraktura kinahanglang motubag sa dinalian og tinuod nga panginahanglan sa komunidad, samtang nagpabiling bukas sa koordinasyon sa mga nasudnong ahensya ug lig-on sa pagpanalipod sa interes ug pundo sa publiko.
Photo Courtesy to: Wikimedia Commons
