Gidala sa balay tambalanan ang usa ka 34-anyos nga mag-uuma human kini gidunggab sa kainom nga 51-anyos nga suspetsado sa Purok Madasigon, Barangay Lala, Pagadian City, niadtong nakalabay nga adalaw.
Sa inisyal nga imbestigasyon, ang biktima ug ang suspetsado nga managsilingan mitambong sa birthday celebration sa ilang silingan ug nagkaatbang pa sa panagtagay sa ilimnong makahubog.
Apan sa diha nga impluwensyado na sa ilimnong makahubog ang duha, gipasanginlan sa suspetsado ang biktima nga nanguha sa iyang kwarta nga gipangulipas sab sa biktima hinungdan sa ilang panaglalis.
Gumikan sa hitabo miuli ang suspetsado sa ilang balay ug sa pagbalik niini may bitbit na kining kutsilyo ug gidunggab ang biktima ubos sa tuong tiyan nga dali sab nga gidala sa pinakaduol nga tambalanan sa nagpakabanang mga kasilinganan.
Dali usab nga miresponde ang kapulisan sa Pagadian City Police Station ug gidakop ang suspetsado ug gibawi ang kutsilyo nga gigamit sa pagdunggab sa biktima.
Nakakustudiya na karon ang suspetsado sa Pagadian City Police Station alang na sa pagpasaka sa tukmang kaso.
Photo Courtesy to: PD ZSPPO, PRO 9
