Nadakpan sa kapulisan ang usa ka babaye human sa malampusong buy-bust operation nga gihimo sa Purok 20, Barangay Poblacion, Bayugan City, alas 2:00 sa kadlawon niadtong nakalabayng adlaw.
Ang operasyon gipangulohan sa Bayugan City Police Station ubos sa liderato ni PLT Noel P. Lambid, sa direktang pagdumala ni PLTCOL Josef Carlo V. Silang, Chief of Police, sa kooperasyon sa Philippine Drug Enforcement Agency (PDEA) Regional Office 13.
Ang nadakpan giila nga si alyas “Ate,” 31-anyos, minyo, high school level, ug residente sa Purok 5, Barangay Pinagalaan, Bayugan City. Siya giakusahan sa paglapas sa Republic Act No. 9165 o ang Comprehensive Dangerous Drugs Act of 2002.
Sa maong operasyon, narekober gikan sa nadakpan ang tulo (3) ka heat-sealed transparent plastic sachets nga adunay puti nga crystalline substance nga gituohang shabu, usa ka shoulder bag, ug ang buy-bust money.
Ang nadakpan ug ang tanang nakumpiskang ebidensya dayon gidala sa Bayugan City Police Station alang sa hustong dokumentasyon ug imbentaryo. Ang gituohang ilegal nga droga ipailawom sa laboratory screening ug confirmatory examination sa Agusan del Sur Provincial Forensic Unit sa Prosperidad.
Sa pagkakaron, ang suspek anaa na sa custodial facility sa Bayugan City Police Station samtang ginahikay ang angay nga kaso batok kaniya.
Photo courtesy: Bayugan City Police Station
