Gipahibalo sa Pag-IBIG Fund Iligan City Branch nga padayon gihapon ang Penalty Condonation Program nga gitanyag sa ahensya alang sa mga employer nga wala pa makatuman sa husto ug tukmang remittance sa kontribusyon sa ilang mga empleyado.
Sumala ni Efren Endriga III, Marketing Specialist sa Pag-IBIG Fund Iligan City Branch, ang pinakabag-ong update sa maong programa nagtumong sa paghatag og kahupayan sa mga employer pinaagi sa pagwagtang sa mga penalty sa ulahi nga remittance.
Gipadayag ni Endriga nga gi-awhag ang mga employer nga mobisita sa buhatan sa Pag-IBIG Fund aron matul-id ang ilang obligasyon ug makapahimulos sa benepisyo sa programa. Matod pa niya, dako kini’g tabang tungod kay wala nay dugang bayrunon gawas sa premium nga angay bayran.
Gipasiugda usab nga ilalom sa Penalty Condonation Program, ang premium lang sa empleyado ang bayran, hinungdan nga makatabang kini sa mga employer nga makadaginot ug makapadayon sa husto nga paghulog sa kontribusyon alang sa ilang mga trabahante.
Padayon ang panawagan sa Pag-IBIG Fund Iligan sa tanang apektadong employer nga manginahanglan og klaro nga impormasyon ug mopahimulos sa programa samtang magamit pa kini.
Photo courtesy to: FAP
