Nagpahimangno ang Nabunturan Municipal Police Station (MPS) sa mga motorista nga mag-amping sa pagbyahe karong nagkaduol na ang panahon sa Pasko, ilabi na sa pagdrive ubos sa impluwensya sa alkohol.
Sumala kang PCPT Joseph Y. Corea, Deputy Chief of Police sa Nabunturan MPS, gi-awhag niya ang mga drayber nga magpugong ug maglimit sa pag-inom aron malikayan ang mga disgrasya sa kalsada.
Iyang gipasiugda ang kahinungdanon sa disiplina ug responsableng pagmaniho aron masiguro ang kaluwasan sa tanang mogamit sa dalan.
Dugang pa, ang mga motorista nga madakpan nga nagmaneho ubos sa impluwensya sa alkohol mahimong kasuhan ilalom sa balaod batok sa Driving Under the Influence of Liquor.
Gipahayag usab ni PCPT Corea nga sa karon wala pa’y natala nga mga kaso nga may kalabutan sa driving under the influence of liquor sa maong lugar. Sumala kaniya, kadaghanan sa mga insidenteng ilang naitala mao ang mga self-accident, lakip na ang mga kahimtangan nga ang sakyanan makabangga og hayop sama sa iro.
Panawagan sa kapulisan sa publiko nga mag-amping sa pagmaneho og sundon ang mga balaod sa trapiko aron malikayan ang mga aksidente, ilabi na karong nagkadool ang panahon sa Kapaskohan.
