Daling girepondihan sa mga personahe sa Coast Guard Station Davao Oriental ang usa ka taho mahitungod sa usa ka tripulante sa barko kinsa kinahanglan hatagan ug medical nga attensyon human kini makasinati ug grabe nga pagkalipong, kalisud sa pagginhawa ug padayon nga pagsuka nga adunay mga timailhan sa dugo samtang ang barko naglawig padulong duol sa Pujada Island, Mati City, Davao Oriental.
Gipatuman gilayon ang Medical Evacuation operation (MEDEVAC) uban sa mga personahe sa gikan sa Special Operations Unit–Davao Oriental (SOU–DAVOR), Harbor and Sea-Based Response Boat 033 (HSRB 033), Coast Guard Sub-Station Mati ug Coast Guard Sub-Station Dahican. Dali usab sila nakig-alayon sa Philippine Ports Authority (PPA) ug sa ahente sa barko aron mapadali ang operasyon.
Human niini, gidala dayun ang biktima sa Mati Port ug gilayong giturn-over sa naghulat nga land transport alang sa pagdala sa Metro Davao Medical and Research Center aron sa dinalian nga medikal nga pagtambal.
Kini nga operasyon nagpakita sa dili matarug nga dedikasyon sa Coast Guard Station Davao Oriental ug sa mga kaubang yunit niini sa pagpanalipod sa kinabuhi sa kadagatan. Gani, nagpakita usab kini sa propesyonalismo nga nagpadayag sa lig-on nga pasalig sa Coast Guard sa kahusayan sa maritime humanitarian assistance.
