Giablihan na sa Department of Agriculture (DA) ang bag-ong Kadiwa ng Pangulo Center sa Clark Freeport aron ibaligya ang bugas sa kantidad nga Php20 matag kilo alang sa mga minimum-wage workers.
Sumala ni Agriculture Secretary Francisco Tiu Laurel Jr., dako kini og tabang aron masiguro ang mas baratong pagkaon alang sa 151,000 ka empleyado sa Clark, diin tunga niini mao ang minimum-wage earners.
Gipasugod na usab sa DA ang pagpalapad sa Benteng Bigas Masterlist Registry System, nga adunay 35,014 ka benepisyaryo sa pagkakaron, isip andam alang sa target nga 15 milyong katawhan nga maka-avail sa 2026.
Pagsugod sa Marso, QR code na ang gamiton sa mga mamalitay, ug padayon ang rehistrasyon hangtod Pebrero 2026.
Gilauman nga moabot sa P23 bilyon ang pondo nga itagana sa DA sa 2026 aron mapadayon ang programa sa P20 nga bugas, nga nakasentro sa pagpalit og humay gikan sa lokal nga mga mag-uuma.
Sukad ilusad ang programa niadtong Mayo karong tuiga, 423 sites sa 81 ka probinsya na ang nag-abli isip P20 Rice Centers.
Photo Courtesy to: BRC
