Napalgan na ang patay’ng lawas sa usa ka 55-anyos nga lalaki human kini naanod sa kusog nga bul-og sa tubig-baha sa Purok 7, Upper Tiparak, Tambulig, Zamboanga del Sur, adlawng Dominggo, Nobyembre 30, 2025.
Ang biktima nailang si Job ug residente sa Barangay Miligan, Molave, Zamboanga del Sur. Matod pa ni Rodrigo, iyang nakaplagan ang patay’ng lawas sa biktima nga nagkulob ug namudmod ang nawong sa kilid sa suba.
Base sa imbestigasyon sa kapulisan, ang biktima nga si Job katapusan nga nakit-ang nagkuha sa iyang Carabao sa suba niadtong Nobyembre 28, apan gumikan sa kalit nga pagbul-og sa tubig baha, siya naanod ug na missing sulod sa pila ka adlaw.
Ang maong hitabo gitaho sa mismong asawa sa biktima sa kapulisan sa Molave Municipal Police Station hinungdan gitabangan ug pangita ang biktima kinsa napalgan sulod sa pila-pila ka adlaw gikan sa iyang pagkaanod.
Gikumpirma sa RHU personnel nga walay foul play ang kamatayon sa biktima ug nag-unang hinungdan sa iyang kamatayon mao ang pagkalumos.
Samtang pahinumdom usab sa mga kapulisan sa publiko nga mahimong mabinantayon sa pagtabok sa mga kasubaan ilabina kon may mga nasinatian nga kusog nga pag-ulan.
Photo for illustration credits to: POLICIJA
