Daghang Pilipino ang na-target sa online scams, nga nagresulta sa pagkawala og gibanabana nga Php280.5 bilyon sa usa ka tuig, base sa pinakabag-ong report sa Global Anti-Scam Alliance (GASA).
Sumala sa survey sa 1,000 ka hamtong nga Pilipino, 77 porsyento nakasinati og scam, samtang 65 porsyento sa mga biktima napildi, kasagaran pinaagi sa digital wallets (74 porsyento), bank transfers, ug cash. Ang kada biktima nawadaan og average Php11,896.
Ang pinakasikat nga scams mao ang investment scams (65 porsyento), unexpected money schemes (64 porsyento), ug shopping scams (58 porsyento). Kasagaran kini gihimo pinaagi sa social media platforms, ilabi na sa Facebook ug Telegram.
Bisan pa sa taas nga exposure, 11 porsyento lang sa biktima ang nakabawi sa ilang kwarta. Daghan ang nagreport sa payment provider o platform apan walay aksyon nga gihimo.
Gawas sa kwarta, 88 porsyento sa biktima nakasinati og stress ug hapit sa katunga nag-ingon nga naapektuhan ang ilang mental health. Usa sa lima kinahanglan pa mangutang tungod sa scam.
Daghang Pilipino ang nag-awhag sa strikto nga silot sa mga scammers, lakip ang 6 ka tuig o labaw pa nga pagkabilanggo, ug 22 porsyento gusto ang full repayment sa biktima.
Gipasiugda sa GASA ug sa mga kauban nga kompanya sama sa Mastercard ug Whoscall ang kooperasyon sa industriya ug gobyerno aron maprotektahan ang publiko batok sa nag-uswag nga digital scams.
SOURCE: PHILSTAR
