Nakadiskobre ang bag-ong namulak nga Rafflesia Schadenbergiana ang Protected Area Management Office o PAMO-AVPL sa Allah Valley Protected Landscape sa South Cotabato.
Diin ang bulak, adunay kalapad nga 93 cm nakit-an kini sa Strict Protection Zone, usa ka lugar nga wala gihilabtan aron mapanalipdan ang talagsaon nga mga tanom.
Sumala sa monitoring team, ang perigone lobe niini 30 cm, ang central disk 21 cm, ug ang opening diameter niini anaa sa 46 cm, usa kini sa importanteng datos alang sa pagtuon sa pagtubo sa mga espisye.
Ang Rafflesia schadenbergiana usa ka critically endangered ug naila nga kinadak-ang klase sa Rafflesia sa Pilipinas ug ikaduha sa kinadak-an sa kalibotan. Ang maong klase sa bulak endemic sa Mindanao ug makita lamang kini sa Davao, Bukidnon, ug South Cotabato.
Dugang pa sa PAMO-AVPL nga kini nga pagkadiskobre importante alang sa pagtuon ug pagkonserba sa mga espisye.
Ang mga programa sa pagmonitor ug pagkonserba nagpadayon sa AVPL aron masiguro ang pagpanalipod sa Rafflesia ug uban pang talagsaon nga mga espisye, lakip ang mga kampanya sa impormasyon alang sa pagpreserbar sa lugar.
Photo Courtesy to:DENR Soccskargen PAMO-AVPL
