Gipalapdan sa Kagamhanan sa Siyudad sa Sugbo ug Department of Social Welfare and Development (DSWD) ang ilang pwersa batok sa pagpakilimos pinaagi sa Pag-Abot Program, nga gisugdan niadtong Hulyo 2023.
Matod pa, nga ang programa nagpadala og mga social workers aron moduol ug modasig sa mga pamilya ug indibidwal nga nagpuyo sa kadalanan sa pag-boluntaryong mosulod sa mga shelter sa South Road Properties (SRP).
Pinaagi sa sanga niini nga Balik Probinsya, Bag-ong Pag-asa (BP2), ang mga gusto mouli sa ilang probinsya tabangan sa gobyerno.
Gisaysay ni DSWD Regional Director Shalaine Marie Lucero nga ang mga benepisyaryo hugot nga gi-assess ug gi-profile usa hatagan og hinabang sama sa pagkaon, medikal nga pag-atiman, temporaryong kapasilungan, suporta sa transportasyon, ug tabang panginabuhian.
Nasayran nga bisan og 16 ka indibidwal ug duha ka pamilya pa lang ang pormal nga na-profile, apan 40 ka indibidwal ang kasamtangang nagpuyo sa mga shelter.
Samtang alang sa dili taga Sugbo, ang DSWD motabang sa pagpangita og rental housing ug moabag sa bayad sa abang sulod sa unom ka bulan ngadto sa usa ka tuig.
