Gipahigayon sa Zamboanga Sibugay Police Provincial Office (ZSBPPO) ang usa ka one-day police operation nga misangpot sa pagkaaresto sa pito 7 ka indibidwal, lakip ang tulo 3 ka wanted persons, ug pagkabawi sa gituohang shabu niadtong nakalabay nga adlaw.
Ubos sa pagpangulo ni PCOL Barnard Danie V. Dasugo, Provincial Director, gipadayon ang kusog nga kampanya batok ilegal nga droga ug pagpangdakop sa mga nalambigit sa ilegal nga kalihukan sa probinsya.
Miresulta ang nasampit nga operasyon sa pagkadakop sa 4 ka drug personalities sa managlahing Drug Buy-bust operations sa RDEU-9, Kabasalan MPS, Titay MPS, Malangas MPS, ug uban pang operating units kung asa nasakmit ang Php 85,000.00 nga kantidad sa gituohang shabu.
Nadakpan usab ang 3 ka wanted persons sa manhunt operations sa Siay MPS, Mabuhay MPS, Ipil MPS, ug uban pang nagtinabangay nga yunit lakip ang rape suspect nga nagtagotago sulod sa 18 ka tuig.
Gidala ang mga nadakpan sa ilang tagsa-tagsa ka Municipal Police Station alang sa hustong disposasyon, samtang ang nakumpiska nga drug items gihatod sa Zamboanga Sibugay Provincial Forensic Unit para sa quantitative ug qualitative examination.
