Gi-awhag sa City Social Welfare and Development Office (CSWDO) Pagadian ang tanang mga ginikanan nga imonitor ang ilang mga kabataan diha sa paggamit sa mga social media account aron mabantayan ang mga lihok niini.
Matod pa ni Florida Taug- Israel, Child and Youth Development Welfare Division Head sa CSWDO Pagadian, angay nga magpakabana ang mga ginikanan ug dili tugotan ang mga bata nga babad sa paggamit sa social media gumikan kay dili kini makahatag og kaayohan sa mga menor de edad.
Gisaysay ni Israel, sa karon halawom ang kampanya sa DSWD kon unsaon sa pagpakgang sa nagkalat nga kaso sa Online Sexual Abuse and Exploitation of Children (OSAEC) Zamboanga Peninsula ug gani sa syudad sa Pagadian hugot ilang monitoring kabahin aning maong mga kaso.
Dungan niini, nanawagan si Israel ngadto sa publiko nga kon may mamatikdan nga mga ginikanan nga nagahimo ug mga law-ay nga pagbaligya ug mga hulagway sa ilang mga kabataan bugti sa kantidad sa salapi dili magduha-duha sa pagreport sa ilang buhatan o diha sa barangay officials.
Kahibaluan, usa sa gihingusgan nga kampanya karon sa DSWD Region 9 nga mapasabot ang kabahin sa online sexual abuse aron ma-aware ang tanang ginikanan o mga indibidwal sa ilang posibleng atubangon kon sila masapon nga magbaligya sa law-ay nga mga hulagway sa mga kabataan pinaagi sa online.
