Gi-instalar na sa Munisipyo sa Ipil ang una niini nga high-technology Closed-Circuit Television (CCTV) system aron mapalig-on ang seguridad sa publiko ug masuportahan ang modernisasyon sa lokal nga pangagamhanan.
Ang maong sistema gilaraw aron makatabang sa pagbantay ug pagpanalipod sa katawhan, ilabi na sa busy nga komersyal nga bahin sa lungsod.
Kini nga modernong CCTV system nagkantidad ug ₱3.4 milyon, nga adunay facial recognition, night vision, speed detection, ug artificial intelligence (AI) nga mga kapasidad. Makakuha kini ug klaro nga hulagway bisan pa gikan sa gilay-on nga hangtod 300 metros, ug makarecord kini 24 oras aron magamit sa kapulisan ug mga emergency response teams alang sa real-time monitoring sa mga panghitabo sa palibot.
Gipasabot ni Mayor Ramses Troy Olegario nga ang maong proyekto usa ka dakong lakang padulong sa kalinaw ug kahapsay sa Ipil, ug nagpakita sa tinguha sa lokal nga pangagamhanan nga mapalig-on ang seguridad ug kalamboan sa lungsod.
