Bag-o lang gipadayag ni Eman Bacosa Pacquiao ang kahimtang sa iyang relasyon sa amahan nga si boxing legend Manny Pacquiao. Sa eksklusibong pakighinabi kang Jessica Soho, gipaambit ni Eman nga dugay na niyang nasabtan ang mga isyu nga naglibot sa relasyon sa iyang mga ginikanan.
Si Eman anak ni Manny ug ni Joanna Bacosa, nga nakaila sa boksidor samtang nagtrabaho kini isip waitress. Naugmad ang ilang pagbati ug nanganak si Joanna kang Eman.
Bisan pa man sa ilang pagkabulag, gipahayag ni Eman nga kanunay niyang gipasigarbo ang iyang amahan. Sa ilang reunion, gisultihan niya si Manny nga gusto niyang ipadayon ang boksing, ug gisuportahan siya niini.
Gipaambit ni Eman nga gitanyagan siya ni Manny nga gamiton ang apelyidong Pacquiao sa iyang karera sa boksing. Matod pa niya, nagka-estoryahay na sila og tinuoray nga “heart-to-heart talk,” ug karon nagpadayon na sila sa pag-ayo sa ilang relasyon.
Si Eman karon aktibong nagboksing ug bag-o lang midaug sa Thrilla sa Manila 2, usa ka event nga gipasiugdahan mismo ni Manny Pacquiao aron sa pagsaulog sa ika-50 anibersaryo sa historic boxing bout ni Muhammad Ali ug Joe Frazier niadtong 1975.
Photo Courtesy to:Philstar.com
