Patay ang usa ka tigulang nga lalaki human gihampak og bato sa ulo sa Purok Orchids, Kabasalan, Zamboanga Sibugay kagahapong adlawa Nobyembre 10 2025. Naila ang biktimang 73 anyos og residente sa nasampit nga lugar human nadiskobrehan sa ka barangay og mitaho gilayon sa kapulisan.
Sumala sa nagrespondeng personahe sa Kabasalan MPS ilang nakit-an ang biktima nga nagkulob nga adunay daghang dugo nga migawas gikan sa ulo niini nga adunay dako nga tipak sa bato duol sa lawas nga gituohang gigamit sa krimen.
Sa inisyal nga imbestigasyon, nasuta nga misulod ang suspetsado agi sa butanganan og aircon kung asa matod pa misulay og pangawat apan nasakpan kini sa biktima nga maoy hinungdan nga gihampak ug gibundakan kinig bato sa ulo sa maong suspek.
Padayon ang imbestigasyon sa Kabasalan MPS uban ang Provincial Forensic Unit aron maila ang suspetsado samtang ang lawas sa biktima gidala sa St. Lourdes Funeral Homes.
Photo for illustration credits to: istock
