LALAKI NGA NANGHASI – PATAY SA TAGUM CITY

Patay ang usa ka lalaki human nang-hasi sa Purok Kalubiran, Barangay Mankilam, Tagum City, Davao del Norte pasado alas-6 sa gabii, Nobyembre 5, 2025. Base sa report sa Tagum City Police Station, nadawat nila ang impormasyon gikan sa Providence Radio Base sa Tagum LGU, nga aduna matod pa, adunay lalaki nga nang-hasi sa nahisgutang dapit.

Pag-abot sa mga pulis, ila nang naabtan nga ang suspek gipugngan na sa mga barangay tanod ug residente, apan kini nakita nga nagahigda na sa yuta nga adunay samad sa ulo.

Giila kining si alyas “Carlos”, 50 anyos, ulitawo, ug residente sa Purok 3, Barangay Poblacion, Mawab, Davao de Oro, nga temporaryong nagpuyo sa balay sa iyang igsoon sa Mankilam sa susamang lungsod.

Sumala sa imbestigasyon, aduna’y dala nga hinagiban si Carlos ug miadto sa tindahan ni Joven Lamera o nangita sa usa ka tawo nga nailhan sa alyas “Dimas. Kalit kining nasuko ug misugod sa pag-hulga sa pamilya ni Lamera. Tungod sa kahadlok, ang pamilya midagan ug nangayo og tabang sa mga silingan ug barangay tanod.

Sa dihang miabot ang mga tanod, gitabangan si Carlos ug gipaninguha sa mga residente ug tanod nga pugngan siya, apan tungod sa iyang kalangas ug pagpanalipod, rason nga nasamdan kini sa ulo nga maoy gitudlong hinungdan sa iyang hinanaling kamatayon.

Samtang ang usa sa mga tanod nga nasamdan gidala sa Tagum Doctors Hospital alang sa medikal nga atensyon. Sa pagkakaron, nagpadayon ang Tagum City Police Station sa imbestigasyon aron mahibal-an ang tinuod nga hinungdan sa maong insidente.