Gipahigayon sa Commission on Elections (COMELEC) kagahapong adlawa, Nobyembre 5, 2025, og on-site voters’ registration sa Igpit Gymnasium, Barangay Igpit, Digos City, gikan alas 8:00 sa buntag hangtod alas 5:00 sa hapon aron kini mapadali ang proseso sa pagpangandam sa umaabot nga piniliay.
Ang maong kalihukan nagtinguha sa paghatag kahigayonan sa mga residente nga makaparehistro ug makapa-update sa ilang mga datos sa pinakapaspas ug hapsay nga paagi.
Ang mga mosunod nga transaksiyon ang pagatugotan naglangkob sa Bag-ong Rehistrasyon (alang sa SK ug regular voters), Reactivation sa daang rehistro, Correction o Pagbag-o sa Status, Transfer of Records gikan sa foreign post ngadto sa lokal, Transfer gikan sa laing siyudad o munisipyo ug Transfer sulod sa siyudad.
Gipahimangnoan sa COMELEC ang tanan nga magdala og usa ka photocopy sa balidong ID isip requirements sa pagpahigayon sa ilang transaksiyon.
Gihangyo sa Barangay Igpit ug sa lokal nga gobyerno sa Digos City ang publiko nga gamiton ang maong oportunidad aron mapadayon ang ilang katungod sa pagboto.
SOURCE: BARANGAY GOVERNMENT OF IGPIT
