Gibuksan na sa Department of Agriculture (DA) ang aplikasyon alang sa Minimum Access Volume (MAV) import quota allocations para sa sunod tuig, nga nagtimaan sa pagsugod sa proseso sa pagpili sa mga negosyanteng gusto mag-import sa baboy, manok, mais, patatas, ug kape ubos sa mas ubos nga taripa.
Sumala sa pahibalo sa DA, ang aplikasyon alang sa 2026 Beginning Year Pool magpadayon gikan Nobyembre 2 hangtod 29, diin gi-set ang gidaghanon sa mga produkto nga pwede i-import ubos sa mga obligasyon sa nasud ilawom sa World Trade Organization (WTO).
Alang sa 2026,adunay volume nga pwede i-import: 54,210 metric tons sa baboy; 23,490 MT sa karne sa manok; 60,000 MT sa chipping potatoes; 216,940 MT sa mais; 1,457 MT sa coffee beans; 37 MT sa coffee extract.
Kinahanglan nga isumite sa mga importer ang ilang aplikasyon online pinaagi sa MAV portal, uban sa mga dokumento sama sa lisensya gikan sa Bureau of Animal Industry (BAI) o Bureau of Plant Industry (BPI), pamatuod sa import history, updated permits, ug tax registration certificates.
Para sa mga bag-ong aplikante, kinahanglan nga adunay kasaysayan sa pag-import og labing menos 9 MT sa baboy ug manok, 6 MT sa patatas, 12.5 MT sa mais, ug 6 MT sa kape.
Ang tanan nga maaprubahan nga aplikasyon kinahanglan nga isumite sa Minimum Access Volume MAV Secretariat sa Quezon City gikan Nobyembre 2 hangtod alas-5 sa hapon sa Nobyembre 29.
Ang Minimum Access Volume MAV system nagtugot sa limitado nga importasyon sa pipila ka produktong agrikultural ubos sa mas ubos nga taripa aron matabangan ang pagpugong sa taas nga presyo sa pagkaon samtang ginaprotektahan gihapon ang mga lokal nga mag-uuma.
Ilawom sa Administrative Order No. 1, series of 1998, ang MAV certificate valid sulod sa tulo ka bulan gikan sa pag-isyu ug pwede kini marevalidate hangtod Pebrero sa sunod tuig.
Gipasabot sa DA nga ubos sa Minimum Access Volume MAV, ang import sa baboy bayran lamang og 15% taripa, kumpara sa 25% kung gawas sa quota. Samtang ang mais, ubos pa gyud — 5% ra ang taripa sulod sa quota, kontra sa 15% kung gawas sa MAV allocation.
Photo Courtesy to: Business Mirror
