Gipaningkamotan sa Iligan City Traffic Parking and Management Office (ICTPMO) nga makadawat og moderno nga ekipo aron mapugngan ang sobra nga kakusog nga pagpadagan sa mga drayber sa dakbayan.
Kini human sa sunod-sunod nga mga aksidente sa kadalanan nga resulta sa walay pag-amping nga pagmaneho sa mga motorista .
Matod ni Ralph Oblenda, ang hepe sa ICTPMO, naglaum ang ilang buhatan nga mahatagan sila ug “speed gun” usa ka ekipo nga makadetect sa tanang klase sa sakyanan ug masukod ang gikusgon sa pagpadagan niini.
Gibutyag ni Oblenda nga usa sa hinungdan sa mga aksidente mao ang kakulang sa disiplina sa mga drayber, diin daghan pa gihapon ang nagmaneho nga walay lisensya, nakainom, o minor de edad.
Nanawagan usab si Oblenda sa mga ginikanan nga dili tugutan ang ilang mga anak nga minor de edad nga magmaniho sa motor o sakyanan, tungod kay wala pa kini tukmang kahibalo sa balaod sa trapiko ug responsableng pagmaniho.
Nunot niini ang ICTPMO nagpadayon sa ilang paningkamot nga mapauswag ang seguridad sa kadalanan, aron malikayan ang aksidente ug mapadayon ang kaluwasan sa tanan nga nagamit sa dalan.
