43-ANYOS NGA LALAKI GIPUSIL SA MAKADAGHANG HIGAYON – PATAY

Patay ang usa ka lalaki human kini gipusil bandang alas 8 sa gabie, Nobyembre 2, 2025 sa Prk. Masagana, Gante Road, Magugpo West dakbayan sa Tagum.

Sa report sa Tagum City Police Station giila ang biktima nga si Robert Wangdali, 43 anyos, minyo, residente sa Prk. Mansanitas, Brgy. Magugpo West, Tagum City.

Subay sa imbestigasyon, nahitabo ang pagpamusil samtang nag-drive sa itom nga Honda CRF nga motorsiklo nga walay plate number ang biktima, gikan sa Gante Road padulong sa Purok Masagana sa dihang pag-abot niini sa maong dapit gipaulanan kinig bala sa wala pa mailhing suspetsado kinsa daling misibat sa wala matino nga direksyon.

Gumikan sa mga naangkong samad pinusilan diha-diha dayon nakabsan sa ginhawa ang biktima.
Narekober sa crime scene ang unom (6) ka mga basiyo sa bala sa .45 kalibre pistola samtang nakuha usab gikan sa posesyon sa biktima ang usa ka improvised tooter, nga subject alang sa kemikal nga eksaminasyon sa Provincial Crime Laboratory Office.

Gidala na ang patay’ng lawas sa biktima sa Tagum Cooperative Funecare alang sa saktong disposasyon. Samtang gikatahong motibo sa maong insedente gituohang personal grudge, ginalantaw usab sa mga otoridad ang lain pang anggulo sa maong pagpamusil.