Gilauman nga ang Pilipinas makatala og pinakataas nga porsiyento sa Generation Alpha (Gen Alpha) tali sa mga dagkong merkado sa Asya, sumala sa BMI.
Sa report nga gipagawas niadtong Miyerkules, gisaysay sa BMI nga ang Gen Alpha mao ang mga indibidwal nga natawo tali sa 2010 hangtod 2024. Pagsugod sa 2026, kompleto na ang henerasyon nga adunay edad nga 1 hangtod 16 anyos, nga nagpasabot nga nagkadako ang ilang papel sa consumer market.
Gipaila ang maong henerasyon nga abtik sa teknolohiya ug giisip nga mga “digital natives” tungod kay natawo sila sa usa ka digital world ug sayo silang na-expose sa teknolohiya.
Sumala sa BMI, ang Gen Alpha sa Pilipinas anaa na sa 27 porsiyento sa populasyon sa 2030, ang pinakataas sa tibuok rehiyon. Gisundan kini sa Malaysia ug Vietnam nga adunay tig-21 porsiyento matag-usa.
Samtang ang Japan ug South Korea, tungod sa edaran nga populasyon ubos ang birth rate, mao ang adunay pinakagamay nga bahin sa Gen Alpha 12 porsiyento ug 11 porsiyento matag-usa.
Gidugang sa BMI nga pagsugod sa 2025, ang Gen Alpha mokabat og 2 bilyones ka tawo o 24.2 porsiyento sa tibuok populasyon sa kalibotan, nga mokabat og 8.3 bilyon. Ang gidaghanon niini gikan sa 687 milyon niadtong 2015 ug gilauman nga magpabilin sa 2 bilyon hangtod sa 2050.
SOURCE: PNA
