Nadamay ang unom ka panimalay sa Purok 1, Barangay Noa, Magpet, Cotabato, human nga nawalaan og brake ang usa 10-wheeler wingvan truck nga kargado og saging, alas 5 sa buntag kagahapong adlawa Oktubre 27, 2025.
Sumala pa usa ka residente nga si Rhea Mae De Asis, tulog sila niadtong higayona ug nagtuo lamang kini nga nagdamgo siya sa usa ka truck nga naghaguros paingon sa ilang panimalay, apan dakong kakurat ug kahadlok niini dihang usa ka dakong truck na ang natumba sa ilang balay.
Dugang pa, nga tulo sila sa iyang anak ug bana sulod sa ilang panimalay dihang nahitabo ang aksidente, apan luyo sa pagkaguba sa ilang balay mapasalamaton gihapon kini tungod wala sila nangaangol sa aksidente.
Saysay ni De Asis, nga natabunan usab sa maong truck ang ilang skygo nga motorsiklo. Sa inisyal nga impormasyon, nawalaan matod pa og brake ang maong truck, hinungdan nga wala na niini na kontrol ang sakyanan ug tungod na usab sa bahada nga dalan sa lugar.
Samtang, daling gidala sa balay tambalan ang driver ug helper sa truck, human naangol sa aksidente lakip na ang ubang mga residenteng nadamay nga nakaangkon og samad.
Sa karon, padayon ang ginahimong imbestigasyon sa Magpet Municipal Police Station may kalabutan sa naasoy nga aksidente.
