Gihisgutan atol sa gipahigayon nga asembliya sa Barangay Antequera, Nabunturan, Davao de Oro niadtong Oktubre 25, 2025 ang kampanya batok sa paggamit sa mga saba nga tambutso o bora-bora sa mga motorsiklo.
Sumala sa barangay Kapitan nga si Jessie Teody S. Tagalog, usa kini sa mga ordinansa nga ilang gipatuman aron mapahapsay ang kalinaw ug kahilom sa komunidad, ilabi na sa panahon sa gabii diin kasagarang makasamok ang saba sa mga tambutso.
Gipahimangnoan usab sa kapitan ang mga kabatan-onan nga tanggalon ang ilang mga saba nga tambutso ug likayan ang pag-usab sa ilang motorsiklo nga makalapas sa balaod.
Gibutyag usab niya nga apil ang mga ginikanan sa pagmonitor sa ilang mga anak nga adunay motorsiklo, ug gidasig silang ipa-rehistro kini sa Barangay Hall aron matuki ug mamonitor kinsa ang mosunod ug mosupak sa maong ordinansa.
Ang kampanya nagtinguha sa pagpakunhod sa kasaba sa mga kalsada ug sa pagpamatuod nga malinawon ug hapsay ang pagpuyo sa Barangay Antequera.
