Gi-angkon sa National Food Authority (NFA) Zamboanga del Sur nga anaa lang sa 5 porsyento ang ilang napalit nga bag-ong inani nga mga humay gikan sa kinatibuk-ang produksyon sa mga mag-uuma sa lalawigan.
Matod ni NFA Zamboanga del Sur Acting Branch Manager Engr. Antonio Lumo, ubos lang ilang absorption rate o kapasidad sa total production ug gani basi sa ilang inventory equivalent lang sa 5 porsyento ang kinatibuk-ang napalit nila nga humay nga anaa karon sa ilang bodega.
Gisaysay ni Engr. Lumo nga buot sila nga mopalit ug daghang humay apan gumikan nga limitado lang ilang drying facilities medyo nalimitahan ilang pagpalit gawas na lang kon uga nang daan ang ibaligya sa mga mag-uuma.
Gipaambit ni Engr. Lumo, sa karon anaa lang sa 400 ka mga bags matag semana ang mahimo nga mapauga sa ilang drying facilities diha sa ilang buhatan.
Apan siya malaumon nga sila makapalit ra ug daghang humay gikan sa mga mag-uuma sunog tuig kon mahuman na ang pag-upgrade sa mga mechanical dryers nga gi-install sa ubang mga lugar dinhi sa lalawigan.
