WILDLIFE TRADER SA M’LANG, NASIKOP TUNGOD SA PAGBALIGYA OG WILD DUCKS ONLINE

Nasikop ang usa ka online seller, nga nibaligya sa tulo ka Philippine ducks (Anas luzonica) atol sa entrapment operation alas-7:25 sa gabii, niadtong Oktubre 23, 2025, sa Purok Maharlika, Brgy. Bagontapay, M’lang, Cotabato.

Gipangunahan sa DENR-12 PENRO Cotabato ang maong operasyon, kauban ang CENRO Matalam, RACU 12, ug M’lang Municipal Police Station. Ang suspetsado nasikop tungod sa paglapas sa RA 9147 (Wildlife Resources Conservation and Protection Act) ug RA 10175 (Cybercrime Prevention Act of 2012).

Nagsugod ang operasyon human nakakita sa usa ka estudyante sa Facebook post nga nagbaligya og Philippine ducks nga nagkantidad og tag-₱1,800 matag usa, uban sa caption nga “Try lang kung may gusto sa wilduck or dakit.” Human sa koordinasyon sa DENR ug RACU 12, gihimo ang entrapment nga miresulta sa pagkasikop sa suspetsado ug pagkabawi sa mga langgam.

Ang Philippine duck usa ka species nga bulnerable ubos sa DAO 2019-09. Ang ilegal nga pagbaligya o pagpangolekta og wildlife silotan ug priso nga unom ka bulan hangtod usa ka tuig ug adunay multa nga nagkantidad og ₱1,000 hangtod ₱100,000.

Sa karon, ang mga nasakmit nga Philillipine Ducks temporaryong gibantayan sa M’lang Municipal Police Station samtang nagpadayon ang imbestigasyon.