Arestado sa mga kapulisan ang duha ka mga individual human kini nakuhaan ug illegal nga druga atol sa gikasang drug buy-bust operation sa may Purok 5, Barangay Upper Laperian, Ramon Magsaysay, Zamboanga del Sur, Oktubre 24,2025.
Nalista ang duha ka dinakpan isip High-Value Individual sa lugar, usa niini 31 anyos lalaki, ug 20 anyos nga babaye nga pulos residente sa lugar.
Ang operasyon gipangunahan sa Ramon Magsaysay Municipal Police Station, uban ang ZSPDEU, ZSPIU, 902nd MC RMFB-9, RSET PDEA, sa koordinasyon sa PDEA-9.
Nakuha gikan sa mga suspetsado ang usa ka dakong putos sa gituohang shabu, lakip ang buy-bust money ug ang usa ka sling bag nga maoy gisudlan sa druga.
Sa karon ang tanang nakuhang ebidensya gidala na sa Zambonga del Sur Provincial Forensic Unit Camp Abelon Pagadian City alang sa Quantitative ug Qualitative Examination.
Samtang ang mga dinakpan tanggong na sa Ramon Magsaysay Municipal Police Station, ug nakatakda kining pasakaan sa kasong may kalabutan sa Republic Act 9165.
Photo courtesy to: ZSPPO
