Gihukman sa korte sa Bacoor, Cavite nga guilty ang aktor nga si Archie Alemania sa kasong acts of lasciviousness nga gipasaka batok kaniya sa aktres nga si Rita Daniela.
Gisentensiyahan ang aktor og hangtod sa usa ka tuig nga pagkabilanggo ug gimanduan usab nga magbayad og Php20,000 isip civil indemnity ug Php20,000 isip moral damages.
Matod sa abogado ni Rita nga si Atty. Maggie Abraham-Garduque, nalipay sila sa desisyon sa korte ug niingon, “Rita attained justice.”
Nagikan ang kaso sa usa ka insidente nga nahitabo niadtong 2024, human gireklamo ni Rita ang aktor tungod sa giingong sexual harassment ug malaw-ay nga mga pulong samtang sila nag-uban sa usa ka sakyanan paingon sa ilang balay gikan sa usa ka event.
Gipaambit usab ni Rita ang screenshot sa iyang mensahe ngadto kang Archie human sa insidente, diin siya miingon nga siya “wala gitahod ug gibastos.” Sa nasangpit nga mensahe, makita usab ang aktor nga nangayo og pasaylo ug niingon nga hubog siya niadtong higayona.
Photo Courtesy to:Diskurso
