Pormal nang gidawat kagahapong adlawa Oktubre 24, 2025, sa dose ka mga Probinsya gikan sa Mindanao, ang 158 ka Patient Transports Vehicles (PTVs), gikan sa Philippine Charity Sweepstakes Office (PCSO) nga nagkantidad ug Php2.3-M matag usa, nga gipahigayon sa Provincial Grandstand, Capitol Grounds, Amas, Kidapawan City, pinangulohan ni PCSO Assistant General Manager for Branch Operations Sector Remeliza Jovita M. Gabuyo ug gitambongan sa mga gobernador ug Mayor sa dose ka probinsiya.
Sa mensahe sa General Manager sa PCSO pinaagi sa iyang representante nga si Gabuyo, gipaabot niini nga nigahin sila og PHP1-B nga kantidad alang sa pagpalit og dugang nga 395 PTVs nga giapod-apod sa tibuok nasud.
Ang pag apod-apod sa mga PTV, kabahin sa gipalapdan nga programa sa PCSO nga nagtarget sa paghatag niini sa 1,724 ka local government units (LGUs) sa tibuok Pilipinas. Sa pagkakaron, ang ahensya nakaapod-apod na og 1,539 ka units nga nagrepresentar sa 89% sa coverage niini.
Ang maong mga PTV nga adunay sulod nga stretchers, oxygen tanks, wheelchairs, first aid kits, blood pressure monitors, ug medicine cabinets. Subay niini, nakadawat ang probinsiya sa Cotabato ug (19) ka units nga gidonar sa kapitolyo, 17 ka lungsod, ug usa ka siyudad sa probinsiya.
Nipadayag usab si Governor Emmylou Mendoza, sa iyang pasalamat sa gihatag nga mga ambulansya nga dako og ikatabang sa paghatod sa mga pasyente ngadto sa mga tambalanan ilabina panahon sa emerhensiya.
Photo Courtesy to:Provincial Government of Cotabato
