Nakatapos sa Tour Package Development and Delivery Seminar Workshop ang Duha ka delegado gikan sa Municipality of Veruela nga sila Mary Cris Guay ug Jericho Delardes nga gipahigayon sa Department of Tourism (DOT) Caraga ubos sa Tourism Industry Skills Program.
Ang tulo ka adlaw nga seminar nagtumong sa pagpalig-on sa abilidad sa mga lokal nga trabahante sa turismo, mga representante sa komunidad, ug mga Lumad aron makabuhat og sustainable ug kulturang nakagamot nga tour packages.
Si Mr. Tryll G. Chiu, usa ka DOT Trainer ug Resource Speaker, maoy nagdumala sa mga sesyon nga mituki sa dagkong hilisgutanan sama sa Overview sa Philippine Tourism Industry, Tourist Handling Techniques, Itinerary Making ug Budgeting, ug Tour Operation Cycle.
Gipahimangno usab sa mga workshop ang pagpreserba sa lokal nga kultura ug yutang kabilin, diin misalmot ang mga representante sa National Commission on Indigenous Peoples (NCIP) ug sa DOT-Caraga Provincial Tourism Office.
Sa iyang mensahe, si Provincial Tourism Officer Dannah Rufalyn M. Buquir mitutok sa papel sa lokal nga komunidad sa pagpalambo sa responsable ug inklusibong turismo. Matod pa niya, “Ang kalamboan sa turismo magsugod sa katawhan nga adunay kaisog ug garbo sa ilang kultura.”
Natapos ang kalihokan pinaagi sa presentasyon sa mga gi-develop nga tour packages, paghatag og sertipiko, ug sa simbolikong Mabuhay gesture, nga nagpasabot sa pagkahiusa aron suportahan ang kampanya nga “Love the Philippines” pinaagi sa kultura ug komunidad nga turismo.
Photo credit: DOT-Caraga
