Gipakita sa mga taga-Cantilan, Surigao del Sur ang ilang kadasig sa pagpalambo sa panglawas pinaagi sa pagpili sa mas nindot nga klase sa bugas.
Matod ni Eunice Y. Suazo, usa ka tag-iya og restawran, “Gusto nako mag-serve og low-glycemic rice sa akong restawran,” human siyang makadungog og diskusyon bahin sa low-glycemic rice atol sa ika-234 nga Araw ng Cantilan.
Gipaila sa Department of Agriculture–PhilRice Agusan ang mga klase sa bugas nga adunay daghang benepisyo sa lawas — sama sa high-zinc rice nga makapalig-on sa resistensya, low-glycemic rice nga makatabang sa pagpaubos sa asukal sa dugo, malusog rice nga puno sa beta carotene, brown rice nga adunay fiber ug B vitamins, ug pigmented rice nga adunay antioxidants batok sa cancer ug sakit sa kasingkasing.
Tungod niini, daghang Cantilangnon ang ganahang mosulay sa mga himsog nga klase sa bugas aron mapaayo ang ilang pagkaon ug panglawas.
Samtang, giandam na usab sa lokal nga gobyerno sa Cantilan ubos sa pagpangulo ni Mayor Rodrigo Eleazar ang ceremonial harvesting sa high-zinc rice sa PhilRice Agusan. Target usab sa lungsod ang 34 ka ektaryang taniman sa zinc-rich rice sa umaabot nga tingtanom.
Photo credit: DA-PhilRice Agusan
