Ubay-ubay ang mga Persons Deprived of Liberty (PDL) sa BJMP–Surigao del Norte nga nakapahimulos sa libreng serbisyo medikal pinaagi sa free skin consultation aron matambalan ang mga sakit sa panit sama sa korekong, bun-i, ug uban pa.
Malipayong giabi-abi ni Dra. Niña Medina-Gonzales, usa ka Fellow sa Philippine Dermatological Society, ang Juander Radyo News Team sa pagpanguna ni KaJuander Kris Maravilla atol sa ilang pagbisita kagahapong adlawa sa jail facility sa probinsya.
Matod ni Dra. Gonzales, ang pagpa-check-up ug pag-atiman sa panit dili lamang usa ka pribiliheyo, kondili usa ka necessity, tungod kay kabahin kini sa panglawas nga aspeto sa matag usa.
Ang maong serbisyo nga gitawag “SKINWEEK” gihimo subay sa National Skin Disease Detection and Prevention Week nga gimugna sa Philippine Dermatological Society ubos sa temang “Kalusugan ng Balat, Para sa Lahat.”
Angayan masayran nga si Dra. Gonzales mao ang bugtong dermatologist sa Surigao City, ug adunay klinika sa Surigao Medical Center sa dakbayan.
