Gipasabot sa kadumalahan sa Gregorio T. Lluch Memorial Hospital (GTLMH) ngadto sa publiko ang sulod sa Memorandum Circular Number 2071-0017, nga may kalabutan sa No Balance Billing Policy.
Matud ni Dr. Richillo Daguman, Chief of Hospital III sa GTLMH, nga padayon nilang gipatuman ang maong palisiya alang sa mga pasyente nga miyembro sa Philhealth ug kadtong nag-avail sa basic services sa ospital.
Gipasabot usab ni Dr. Daguman nga pinaagi sa maong palisiya, wala nay bayran pa ang mga pasyente nga sakop sa PhilHealth, apil na ang ilang mga dependent. Ang bayrunon awtomatikong ikaltas sa PhilHealth, busa wala nay angayang ikabalaka ang pasyente sa bayranan sa ospital.
Kini nga lakang usa ka paagi sa ospital aron masiguro nga ang mga benepisyaryo sa PhilHealth makadawat ug patas nga serbisyo medikal, bisan unsa pa ang ilang kahimtang sa kinabuhi.
