Misaka og gamay ang inflation ngadto sa 1.7% sa Septiyembre gikan sa 1.5% sa Agosto tungod sa mas paspas nga pagsaka sa presyo sa transportasyon ug pagkaon ingon man sa mga bayranan sa restaurant ug cafeteria.
Ang inflation mao ang paspas nga pagsaka sa presyo sa mga palaliton gikan sa pagkaon, ilimnon, sigarilyo, plitehan, krudo hangtod sa tuition ug load sa mga cellphone ug internet.
Bisan og misaka ang inflation niadtong Septiyembre, ubos gihapon kini sa target sa Bangko Sentral ng Pilipinas nga 2-4%, isip resulta nga igo na aron makatabang sa paglambo sa ekonomiya.
Gibutyag ni Philippine Statistics Authority Undersecretary ug National Statistician Dennis Mapa nga paspas ang inflation sa transportasyon ngadto sa 1% niadtong Septiyembre gikan sa -0.3% niadtong Agosto tungod sa pagsaka sa presyo sa diesel ug gasolina.
Ang food inflation misaka usab ngadto sa 1% gikan sa 0.9% niadtong Agosto, nga nakaapekto usab sa restaurant inflation.
Sumala sa PSA, 3 lang ka grupo sa mga palaliton ang nakatala og mas taas nga inflation sa pagkaon ug ilimnon, transportasyon ug restawran ug 3 usab ang nakatala og ubos nga inflation sa ilimnon ug yosi, health, personal care ug lain-laing mga butang ug serbisyo.
Ang inflation sa laing 7 ka grupo sa mga palaliton, lakip ang edukasyon, serbisyong pinansyal, information and communication nagpabiling wala naglihok.
Photo Courtesy to:Inquirer.net
