Pwede nang bayaran pinaagi sa installment ug dacion en pago ang delinquent account o balanse sa mga employers ngadto sa buhatan sa Social Security System (SSS), labi na sa hisgutanan sa benepisyo sa mga empleyado.
Sumala pa ni SSS Regional Communications Officer Noel Nacion, nga ang installment kinahanglang updated ang kasamtang kontribusyon ug ang pipila ka bulan nga wala nabayaran mao ang anam-anaman sa employer, depende usab sa sabot tali sa employer ug account officer.
Dugang pa, nga gawas niini pwede usab bayaran pinaagi sa dacion en pago o ang pagbayad nga imbes kwarta, kabtangan ang ihatag sa employer ngadto sa SSS nga matod pa nahimo na usab sa laing lugar sama sa GenSan.
Kini nga lakang, aron masiguro nga makahatag og kontribusyon ang mga employers alang sa ilang mga empleyado ngadto sa SSS.
Ilawom sa Republic Act No. 11199 o ang Social Security Act of 2018, nga ang employer kinahanglang magbayad og bahin sa kontribusyon sa SSS alang sa ilang empleyado. Kini nga kontribusyon kinahanglang isumite sa matag bulan, kung asa adunay porsyento nga ihatag ang employer ug ang empleyado nga magdepende sa salary bracket sa empleyado.
