Gipatuman sa Department of Trade and Industry (DTI) ang price freeze sa mga probinsya ug lungsod nga naapektohan sa Super Typhoon Nando ug Severe Tropical Storm Opong.
Apil niini ang Cagayan, Masbate, Oriental Mindoro, Biliran, Romblon, ug ang mga lungsod sa Pagudpud sa Ilocos Norte, Dagupan sa Pangasinan, Calbayog ug San Vicente sa Samar, ingon man Ibajay sa Aklan.
Matod sa DTI, nagpabilin sa naandang presyo ang mga nag-unang palaliton ug produkto sa mga lugar nga naigo sa bagyo.
Bisan pa sa temporaryo nga pagsira sa pipila ka negosyo, kadaghanan sa mga merkado, groceries, ug supermarkets sa Masbate abli na pag-usab ug balik normal na ang gidaghanon sa mga konsumidores.
Nagpahimangno ang ahensya nga ang paglapas sa awtomatikong price freeze adunay silot nga usa hangtod napulo ka tuig nga pagkabilanggo ug multa nga magsugod sa ₱5,000 hangtod ₱1 milyon ilawom sa Price Act.
Samtang, gisiguro usab sa DTI nga padayon sila nga makig-koordinar sa mga distributor ug retailer aron mamintina ang igo nga suplay sa mga nag-unang palaliton sa mga lugar nga naigo sa bagyo.
Photo Courtesy to: Baskog
