Arestado ang usa ka 38 anyos nga lalaki atol sa gikasa nga drug buy-bust operation sa Philippine Drug Enforcement Agency (PDEA) Regional Office XIII– Surigao del Norte Provincial Office , Setyembre 29, 2025, sa Purok Millions, Barangay Taft, Surigao City.
Ang suspek naila nga si Clint Zabala y Fernandez, 38 anyos, walay trabaho, ug residente sa Barangay Taft, Surigao City, notado nga high-value target (HVT).
Nasakmit gikan sa suspek ang tulo ka heat-sealed transparent plastic sachets nga adunay sulod nga giingong shabu nga may kabug-aton nga 3.03 gramos og gibanabana sa kantidad nga ₱24,000 ang street price (₱20,600 standard value).
Usa niini adunay 0.03 gramos nga gibaligya sa ₱1,000 samtang duha ka sachets nga adunay sulod nga 3 gramos nakuha diha sa iyang lawas.
Nakuha usab ang usa ka ₱1,000 bill nga gigamit isip buy-bust money, lain-laing paper bills na mikabat sa ₱670, ug usa ka Techno android phone.
Pasakaan ang suspek sa kasong paglapas Sections 5 ug 11, Article II sa Republic Act 9165 o Comprehensive Dangerous Drugs Act of 2002.
